Heimir Guðjónsson hefði viljað ganga lengra í endurnýjun á leikmannahópi karlaliðs Vals síðasta vetur. Hann ræðir þetta í hlaðvarpsþættinum Chess After Dark.

Heimir var látinn fara frá Val á miðju tímabili eftir dapurt gengi. Ólafur Jóhannesson tók við.

Einhverjar breytingar urðu á leikmannahópi Vals síðasta vetur, þar sem meðal annars var ákveðið að láta markvörðinn Hannes Þór Halldórsson fara.

„Það var hárrétt,“ segir Heimir um þá ákvörðun, en hún þótti umdeild.

„Það er þannig með erfiðar ákvarðanir að það eru ekkert allir sáttir við þær, hvort sem það eru stjórnarmenn, þjálfarar, leikmenn eða fólkið sem mætir á völlinn.“

Heimir hefði viljað fara í meiri endurnýjun á leikmannahópi Vals fyrir tímabil.

„Ef þú ætlar að gera þessar breytingar þá er betra að fara alla leið og klára þetta, byrja svo að byggja upp aftur. Það getur tekið einhvern tíma.

Ég hefði viljað fara lengra og klára það og svo fara af stað aftur.“