Pierre-Emerick Aubameyang, framherji Arsenal, segir í færslu á Instagram að það sé í góðu lagi með hjarta hans.
Aubameyang yfirgaf landslið Gabon á Afríkumótinu að sögn vegna hjartavandamála. Hann sneri aftur til Lundúna til þess að fara í skoðanir vegna þeirra.
,,Sæl öllsömul. Ég er kominn aftur til Lundúna til að fara í nokkrar prófanir. Ég er glaður að segja ykkur frá því að það er í góðu lagi með hjartað á mér og ég við hestaheilsu!! Ég kann virkilega að meta öll skilaboðin síðustu daga. Ég er mættur aftur,“ skrifaði Aubameyang á Instagram.
Framherjinn hefur verið í vandræðum undanfarnar vikur. Undir lok síðasta árs var fyrirliðabandið hjá Arsenal tekið af honum í kjölfar agabrots og síðan þá hefur hann ekki spilað leik fyrir liðið.
Svo gæti farið að Aubameyang fari á láni til Al-Nassr í Sádí-Arabíu í þessum mánuði.
