Rætt var um stefnu karlaliðs FH í síðasta þætti af hlaðvarpinu vinsæla, Dr. Football. Þar voru menn ekki mjög hrifnir af gangi mála í Hafnarfirðinum.
FH hefur undanfarið ár eða svo sótt unga leikmenn eins og Vuk Oskar Dimitrijevic, Oliver Heiðarsson, Ólaf Guðmundsson, Harald Einar Ásgrímsson og nú síðast Mána Austmann.
Í þessum glugga hefur FH einnig nælt í Kristinn Frey Sigurðsson frá Val, reynslumikinn leikmann úr efstu deild.
,,Við tókum KR-inga svolítið af lífi um daginn fyrir average-glugga. Mér finnst kaupin hjá FH ekkert betri en það,“ sagði Albert Brynjar Ingason í Dr. Football.
Hrafnkell Freyr Ágústsson, sem er vel að sér í málefnum ungra leikmanna, segir FH ekki vera að sækja nægilega góða unga leikmenn. ,,Það á að taka einhverja stefnu að sækja unga leikmenn en að mínu mati er verið að sækja B-týpur af þessum ungu leikmönnum.“
Hjörvar Hafliðason, stjórnandi þáttarins, sló þá á létta strengi en skaut þó á FH-inga. ,,Setjum þetta í mannamál. Þeir eru ekki að versla þetta úr Byko, þeir eru að versla þetta úr einhverjum gámi.“
FH hafnaði í sjötta sæti Pepsi Max-deildarinnar á síðustu leiktíð.