Alan Shearer, markahæsti framherjinn í sögu ensku úrvalsdeildarinnar og fyrrum landsliðsmaður Englands, segir það auðsjáanlegt að Marcus Rashford, leikmaður Manchester United, sé ekki að njóta sín jafn mikið og áður inn á knattspyrnuvellinum.

Rashford var í byrjunarliði Manchester United í gærkvöldi í leik gegn Aston Villa í enska bikarnum. Hann náði ekki að heilla og hefur aðeins skorað þrjú mörk í fimmtán leikjum á tímabilinu.

Shearer var sérfræðingur hjá BBC í kringum leik Manchester United og Aston Villa í gærkvöldi. Hann segir hlutina ganga erfiðlega fyrir Rashford í augnablikinu.

,,Ég veit að hann hefur verið að glíma við meiðsli, veit að sjálfstraust hans er brotið og að hann hefur verið að gera frábæra hluti utan vallar. En á alltof mörgum köflum á þessu tímabili er eins og það sé verið að biðja hann um að gera húsverk inn á vellinum, þetta er erfiðisvinna fyrir hann og það lítur út fyrir að hann sé ekki að njóta sín eins mikið innan vallar,“ sagði Shearer á BBC í gærkvöldi.

Rashford spilaði 86 mínútur í leik gærkvöldsins áður en honum var skipt af velli fyrir Anthony Elanga. Leiknum lauk með 1-0 sigri Manchester United sem er komið áfram í næstu umferð enska bikarsins.

,,Það vantar allan neista, hann er flatur,“ sagði Alan Shearer um frammistöðu Marcus Rashford í gær.