Ivan Toney verður ekki með enska landsliðinu gegn Ítalíu í Þjóðadeildinni í kvöld samkvæmt helstu miðlum á Englandi.

Framherjinn var valinn í enska landsliðið í fyrsta sinn í síðustu viku. Hann verður hins vegar einn af fimm leikmönnum sem verða ekki með gegn Ítalíu í kvöld.

Hinir eru Marc Guehi, Ben Chilwell, Jordan Henderson og John Stones, sem er þó í banni.

Toney hefði getað valið að spila fyrir lærisveina Heimis Hallgrímssonar í Jamaíka vegna fjölskyldutengsla þar. Hann hefur þó tekið ákvörðun um að leika fyrir hönd Englands, þar sem hann fæddist, í landsliðaboltanum.

England mætir Þýskalandi á mánudag. Vonast Toney til að fá sénsinn til að spila sinn fyrsta landsleik fyrir Englands hönd þar.

Enska liðið er á botni riðils síns í A-deild Þjóðadeildarinnar, þremur stigum á eftir Ítölum. Liðið getur því fallið niður í B-deild með tapi í kvöld.