Martin Braithwaite yfirgaf raðir Barcelona í sumar og hélt til nágranna þeirra í Espanyol. Börsungar reyndu hvað þeir gátu að losna við hann og það tókst að lokum. Stuðningsmenn komu illa fram við hann undir það síðasta.

„Ég veit ekki hvort ég hafi tekið þessu eins og einelti. En ég held það sé samt alltaf mikilvægt að hugsa um andlegu hliðina hjá öðru fólki,“ segir Braithwaite við danska fjölmiðilinn Ekstra Bladet.

„Í raun get ég bara hlegið að mörgu af því sem gekk á á bakvið tjöldin.“

„Ég tel mig hafa svarað gagnrýnendum mínum. Ég var markahæstur á síðustu leiktíð áður en ég meiddist.“

Braithwaite gekk í raðir Börsunga í byrjun árs árið 2019. Xavi tók við stjórn Börsunga í fyrra og var danski framherjinn aldrei í hans plönum.

„Það var skipt um stjóra og hann vildi eitthvað annað. Það er hluti af fótbolta og lífinu. Xavi trúði ekki á mig svo ég þurfti að fara.“

Braithwaite hefur farið vel af stað með Espanyol og skorað tvö mörk í tveimur leikjum. Hann hlakkar til að mæta sínu fyrrum liði.

„Þegar ég spila við Barca vil ég fara út á völlinn og vinna. Ég ræð því ekki hvernig stuðningsmenn munu taka á móti mér.“