Jack Grealish, leikmaður Manchester City, grínaðist í liðsfélaga sínum Erling Haaland í samtali við blaðamenn í dag.

Haaland er talinn einn besti framherji heims en hann kom til Englandsmeistarana í sumar frá Borussia Dortmund.

Haaland er þekktastur fyrir gæði sín innan teigs en skoraði fyrir utan teig í 4-1 sigri á Wolves á laugardag.

Norðmaðurinn er ekki þekktur fyrir að skora mörk fyrir utan teig og er það eitthvað sem Grealish átti létt með að benda á.

,,Að mínu mati þá erum við með besta framherja heims í okkar röðum og hann er heltekinn af því að skora mörk og vera í teignum,“ sagði Grealish.

,,Ég held að það sé undir okkur komið að koma boltanum í teiginn. Ég var að ræða við hann og nefndi að ég væri hissa á að hann gæti skorað mörk fyrir utan teig!“