Það kom upp leiðinda atvik í leik Inter Miami og DC United í MLS-deildinni vestanhafs í gær. Fyrrnefnda liðið var þá nálægt því að ganga af velli og jafnvel gefa leikinn vegna meints kynþáttníðs af hálfu leikmanns DC.

Taxiarchis Fountas er sakaður um að hafa beitt Damion Lowe í liði Inter kynþáttaníði.

Wayne Rooney er stjóri DC á meðan fyrrum liðsfélagi hans Phil Neville er við stjórnvölinn hjá Inter. Þeir ræddu saman á hliðarlínunni eftir að meint atvik kom upp. Að lokum fór það svo að Rooney tók Fountas af velli.

„Ég var tilbúinn að gefa leikinn til að senda skilaboð,“ sagði Neville eftir leik. Hann hrósaði svo Rooney. „Mér hefur alltaf fundist hann vera klassanáungi og að mínu mati gerði hann eitthvað sem skiptir meira máli en nokkuð mark sem hann skoraði á ferlinum (með því að taka Fountas af velli.“

„Við erum félag sem er stolt af fjölbreytileika sínum. Það er ekkert pláss fyrir rasisma í knattspyrnuheiminum eða samfélaginu. Orðið sem var notað er ekki ásættanlegt. Þetta er versta orð í heimi,“ sagði Neville.

Rooney vildi ekki tjá sig mikið um málið. „Það kom kvörtun og ég er viss um að þetta verður rannsakað. Meira get ég ekki sagt.“

Guðlaugur Victor Pálsson er á mála hjá DC United. Hann lék allan leikinn í gær. Lauk honum 2-3 fyrir Inter Miami.