Luiz Felipe Scolari hefur tjáð sig um stuttan tíma sem hann eyddi hjá Chelsea á sínum tíma en hann var ráðinn til félagsins árið 2008.

Þar þurfti Scolari að vinna með stórum persónuleikum á borð við Didier Drogba og Nicolas Anelka.

Scolari átti mjög skrautlegan feril sem knattspyrnustjóri en hann er í dag 73 ára gamall og starfar hjá Athletico Paranaense í Brasilíu.

Scolari náði aldrei því besta úr leikmannahóp Chelsea og var það að hluta til því hann lenti upp á kant við helstu stjörnur liðsins.

,,Chelsea var í ákveðnum meiðslavandræðum og ég þurfti að vera leiðtoginn sem varð til þess að ég lenti upp á kant við einn eða tvo leikmenn,“ sagði Scolari.

,,Anelka og Drogba. Sjúkraliðið taldi að við ættum að leyfa Drogba að fara og jafna sig í Cannes um mitt sumar. Ég taldi að hann ætti að vera áfram í London.“

,,Ég væri líka til í að fara til Cannes um sumartímann og vera það í mánuð eða tvo og njóta lífsins.“

,,Þegar hann sneri aftur þá reyndi ég að aðlagast því að Drogba og Anelka gætu spilað saman. Anelka var markahæstur í deildinni. Við funduðum með Anelka sem sagðist aðeins spila eina stöðu.“

,,Það vantaði aðeins upp á vinskapinn og virðinguna. Þeir voru báðri frábærir en einhver þurfti að sinna öðru hlutverki, að hjálpa þegar boltinn tapaðist.“

,,Þeir vildu engum illt en þetta gerðist og ég tapaði einu af stærstu tækifærum ferilsins.“