Kári Árnason, fyrrum landsliðsmaður og yfirmaður knattspyrnumála hjá Íslands- og bikarmeisturum Víkings, er gestur í nýjasta þætti Steve Dagskrá.

Kári, sem lagði skóna á hilluna síðasta haust, eftir að hafa unnið Íslands- og bikarmeistaratitilinn með Víkingi á síðustu leiktíð, fer yfir ýmislegt í viðtalinu, þar á meðal hver einfaldasta leiðin til að koma sér framhjá vörnum í íslenskum fótbolta er.

„Besta leiðin til að sleppa í gegn í íslenskum fótbolta, í meistaraflokki, er í gegnum þríhyrningsspil því það virðist enginn kunna að verjast því, þetta er með ólíkindum,“ segir Kári.

„Þetta er bara eitthvað sem menn temja sér og er bara náttúrulegt hjá þeim, að elta boltann með augunum. Það er nóg, þá ertu bara farinn.“

Kári væri til í að sjá tekið fyrir þetta þegar leikmenn eru yngri. „Þegar Breiðablik spilar á móti slakari liðunum í deildinni þá komast þeir í gegn svona. Þetta er mjög einfalt. Ég myndi halda að þetta ætti að hætta eftir fjórða flokk, en það er svo sannarlega ekki þannig.“