Knattspyrnumaðurinn Giovanni Padovani er grunaður um að hafa orðið fyrrum kærustu sinni, Alessandra Matteuzzi, að bana á hrottalegan hátt.

Frá þessu greina ítalskir miðlar sem og enskir en Padovani er 27 ára gamall og var kærasta hans Matteuzzi 56 ára gömul.

Greint er frá því að Matteuzzi hafi verið í símanum að ræða við systur sína er Padovani réðst að henni og heyrðust mikil öskur.

,,Hún fór út úr bílnum og stuttu seinna byrjaði að öskra, hún grátbað hann um að hætta og kallaði á hjálp,“ segir systir Matteuzzi í samtali við sjónvarpsstöð á Ítalíu.

,,Ég var enn í símanum og hringdi á lögregluna sem mætti á staðinn um leið. Ég bý í 30 kílómetra fjarlægð. Hann lamdi hana til dauða.“

Matteuzzi og Padovani höfðu verið saman í um eitt ár en voru í fjarsambandi þar sem hún býr í Bologna og hann spilar fótbolta í Sikiley.

Sambandið var þó búið þegar árásin átti sér stað en Matteuzzi hafði tilkynnt manninn til lögregulu og ásakað hann um að áreita sig sem og elta.

Padovani er fyrrum leikmaður Napoli og var í unglingaliði félagsins en ferillinn fór aldrei almennilega á flug og hefur hann spilaði C og B deildum Ítalíu.

Hann átti að spila bikarleik fyrir lið Sancataldese um síðustu helgi en lét ekki sjá sig í leik gegn Catania.

Padovani flaug til Bologna í kjölfarið og átti árásin að hafa átt sér stað stuttu seinna.

Talið er að Padovani hafi ráðist að fyrrum kærustu sinni með hafnaboltakylfu en hún var enn á lífi er læknalið mætti á staðinn en var úrskurðuð látin ekki löngu seinna.