Ísak Bergmann Jóhannesson og Hákon Arnar Haraldsson, leikmenn FCK í Danmörku, komu sér í fréttirnar í fyrradag fyrir að þrífa klefa liðsins eftir leik gegn Trabzonspor, þar sem Kaupmannahafnarliðið tryggði sér sæti í riðlakeppni Meistaradeidar Evrópu.

Ísak og Hákon byrjuðu á bekk FCK í fyrrakvöld. Sá síðarnefndi kom við sögu þegar lítið var eftir. FCK vann fyrri leikinn á Parken 2-1 og dugði markalaust jafntefli í Tyrklandi því til að komast áfram.

Að leik loknum voru það svo íslensku strákarnir Ísak og Hákon sem tóku sig til og þrifu búningsklefann. Ísak sá um að týna upp flöskur á meðan Hákon var á sköfunni og sá til þess að allt rusl yrði tekið upp af gólfinu.

Framkoma íslensku drengjanna vekur mikla athygli víða um heim og í færslu FCK segir að þeir séu vel uppaldir. Fá drengirnir mikið lof frá bæði dönsku og tyrknesku þjóðinni.

„Ég varð stolt þegar ég sá myndina. Mér finnst líka alltaf gott þegar lið skilja við klefann með sómasamlegum hætti. Það er rétt og fallegt að gera það,“ segir Jónína Halla Víglundsdóttir, móðir Hákons, við Fréttablaðið um framkomu drengjanna.

Hinn 19 ára gamli Hákon kom inn í unglingastaf FCK fyrir þremur árum síðan og hefur unnið sér inn sæti í aðalliðinu. Jónína er afar sátt með hvernig staðið er að málum hjá Kaupmannahafnarfélaginu.

Hún segir leikmönnum kennt meira en bara fótbolta, eins og hegðun og framkomu utan vallar.

„Þegar ég hef farið út að horfa á þessa leiki í yngri flokkunum finnst mér hegðun leikmanna alltaf góð. Bæði gagnvart mótherjum og dómurum. Mér fannst það ákveðinn munur þar og hér á Íslandi. Þeir komast ekkert upp með að vera með einhverja stæla – það er ekkert í boði.“

Nánar er rætt við Jónínu í Fréttablaðinu.