Gísli Eyjólfsson ræddi við RÚV í kvöld eftir leik Breiðabliks og HK í Mjólkurbikar karla.

Breiðablik vann þennan leik 1-0 í Kórnum og mun spila við Víking Reykjavík í undanúrslitunum.

Gísli segir að verkefni kvöldsins hafi verið erfitt en leikmenn voru meðvitaðir um það fyrir upphafsflautið.

,,Þetta var virkilega erfiður leikur, við vissum að HK-ingar myndu koma vel stemmdir og gíraðir til leiks, það er alltaf gaman í Kópavogsslag,“ sagði Gísli við RÚV.

,,Við þurftum að hafa fyrir fyrsta markinu, þeir voru þéttir til baka og við þurftum að hafa okkur alla við til að ná þessu marki. Við náðum ekki að ganga frá þessu en sem betur fer dugði eitt mark.“

Gísli var svo spurður út í næsta verkefni gegn Víkingum í undanúrslitunum en hann hafði ekki heyrt af drættinum fyrir viðtalið.

Hann var einnig spurður út í atvikið sem átti sér stað í síðasta leik liðanna er Blikar voru gagnrýndir fyrir að nota boltastráka til að tefja leikinn.

,,Já ókei bara geggjað að fá rematch. Þetta eru skemmtilegustu leikirnir til að spila, við bestu liðin.“

,,Ég veit ekki hvaða væl þetta var, ég var sjálfur í þessu þegar ég var lítill boltasækjari. Maður gerir allt til að vinna.“