Mikil umræða hefur skapast á samfélagsmiðlum um boltasækja eftir jafntefli Breiðabliks og Víkings Reykjavíkur í Bestu deild karla í gær.

Víkingar vilja meina að boltasækjurum hafi verið fyrirskipað að tefja leikinn og veri lengi að koma boltanum í leik.

„Að nota boltasækjara á þennan hátt er eins óíþróttamannslegt og það verður. Vona að menn sem fyrirskipa þetta séu stoltir af sér,“ skrifaði Heimir Gunnlaugsson, formaður knattspyrnudeildar Víkings á Twitter í gærkvöldi.

Margir Blikar vísa þessu til föðurhúsa. Þar á meðal er sparkspekingurinn Kristján Óli Sigurðsson.

„Þetta er bara væl og skæl. Guðjón Þórðarson notaða boltasækjarana á gullaldarárum Skagans. Hann stjórnaði því,“ segir Kristján í nýjasta þætti Þungavigtarinnar.

„Ætla Víkingar að fara að væla yfir því og segjast hafa unnið leikinn ef boltastrákarnir hefðu verið tveimur sekúndum fljótari að kasta boltanum í leik? Þetta skipti engu máli varðandi þennan leik.“