Leikarinn heimsfrægi Will Ferrell sendi vængmanninum Gareth Bale skilaboð áður en sá síðarnefndi gekk í raðir LAFC í Bandaríkjunum í sumar.

John Thorrington, forseti bandaríska félagsins, greinir frá þessu en Ferrell er nafn sem flestir munu kannast við úr kvikmyndabransanum.

Hann hefur leikið í fjölmörgum gamanmyndum í gegnum árin og er gríðarlega vinsælt nafn í Hollywood.

Ferrell er hluti af eigendahópi LAFC og vildi mikið fá Bale til félagsins en hann er einnig mikill áhugamaður um fótbolta.

Bale ákvað að lokum að taka skrefið til Bandaríkjanna og hver veit hvort skilaboð Ferrell hafi eitthvað með það að gera.

,,Ég man ekki nákvæmlega hvenær samræðurnar áttu sér stað en hann fékk persónuleg skilaboð frá Will Ferrell,“ sagði Thorrington.

,,Við erum með magnaða eigendur sem eru mjög ákveðnir í að ná ákveðnum og settum markmiðum.“