Fyrr í sumar lét FH Ólaf Jóhannesson fara sem þjálfara karlaliðs félagsins. Gengi liðsins hafði verið dapurt framan af sumri.
Við liðinu tók Eiður Smári Guðjohnsen. Gengið hefur þó aðeins versnað frá því hann tók við.
Í gær tapaði FH 4-1 gegn ÍBV í Bestu deildinni. Liðið er í tíunda sæti deildarinnar, stigi fyrir ofan Leikni Reykjavík, sem á tvo leiki til góða.
Hörður Magnússon, goðsögn í FH og íþróttalýsandi með meiru, er gestur í nýjasta þætti Chess After Dark. Þar fór hann meðal annars yfir brottrekstur Ólafs.
„Hvernig hann var látinn fara var fyrir neðan allar hellur,“ segir Hörður.
Hann hélt áfram. „Það var bara strax eftir leik. Leyfið manninum að fara í viðtal, fara heim, sofa á þessu, tökum fund síðan daginn eftir. Þú gerir ekki svona við goðsögn. Mér fannst þetta óvirðing.“
„Þetta er bara ein margra skrýtinna ákvarðana sem hafa verið teknar í Kaplakrika á undanförnum árum.“
Hvað gengi FH varðar er Hörður ekki bjartsýnn. „Fyrir 2-3 vikum hélt ég að þeir myndu rétta úr kútnum. Þó ég vissi að þeir væru ekki að fara í efri hlutann. En það eru engin teikn á lofti um að það muni gerast. Þetta er að mörgu leyti óskiljanlegt.“
„Þetta er höfuðlaus her og innkoma Eiðs Smára hafði áhrif fyrstu leikina en svo fóru menn í sama farið.“
