Antonio Conte, stjóri Tottenham, segir að Chelsea hafi gert góð kaup í að fá Romelu Lukaku til sín í fyrra en hann stóðst alls ekki væntingar síðasta vetur.

Conte þekkir vel til Lukaku en þeir unnu saman hjá Inter Milan þar sem Lukaku spilar nú á lánssamningi.

Conte telur að Lukaku þurfi ákveðna meðferð til að ná árangri og er viss um að hann geti spilað fyrir Chelsea aftur einn daginn og náð að sýna meira en hann gerði á síðustu leiktíð.

,,Romelu bjó í Milan í tvö ár og hann var kóngurinn. Stuðningsmennirnir sýndu honum mikla ástríðu og þetta er náungi sem þarf á því að halda,“ sagði Conte.

,,Þess vegna held ég að hann hafi viljað fara aftur til Milan en ég er viss um að þetta hafi verið góð kaup fyrir Chelsea. Það eru leikmenn sem þurfa meiri tíma til að hafa sem mest áhrif.“

,,Við erum að tala um leikmann sem kom aftur til Chelsea og nú var hann lánaður til Inter í eitt tímabil – hann er með gæðin til að spila í ensku úrvalsdeildinni.“