Alfreð Finnbogason hefur mætt á tvær æfingar hjá FH til að halda sér í formi á meðan hann leitar sér að nýju félagi í atvinnumennsku. Þetta hefur 433.is fengið staðfest.

Alfreð er án félags eftir að samningur hans við Augsburg í Þýskalandi rann út. Alfreð hefur hafnað nokkrum tilboðum en heldur sér í formi til að vera klár í næsta stríð.

Alfreð hefur æft með Lyngby í Danmörku undanfarnar vikur en danska félagið undir stjórn Freys Alexanderssonar hefur sýnt framherjanum áhuga. Ólíklegt er þó að Lyngby hafi efni á framherjanum knáa.

Alfreð hafði verið í herbúðum Augsburg frá 2016 en þessi 33 ára gamli sóknarmaður hafnaði meðal annars Hammarby í Svíþjóð á dögunum.

FH er í vandræðum í Bestu deildinni en fyrrum samherji Alfreðs í landsliðinu, Eiður Smári Guðjohnsen er þjálfari liðsins.