Kalidou Koulibaly, leikmaður Chelsea, hefur tjáð sig um framherjann Romelu Lukaku sem yfirgaf félagið í sumar.

Búist var við miklu af Lukaku síðasta vetur er hann kostaði tæplega 100 milljónir punda frá Inter en lítið gekk á hans fyrsta tímabili.

Lukaku vildi því um leið snúa aftur til Ítalíu í sumar til Inter Milan þar sem Koulibaly mætti honum á sínum tíma er hann lék með Napoli.

Koulibaly hefur farið yfir stöðu leikmannsins og af hverju hann náði ekki hæstu hæðum í London.

,,Romelu er góður leikmaður og mjög hæfileikaríkur. Hann er mjög sterkur og ég var vanur því að spila gegn honum á Ítalíu. Ég held að það hafi ekki verið gaman fyrir hann!“ sagði Koulibaly.

,,Hann skoraði mörg mörk á Ítalíu og vann deildina svo þegar hann skrifaði undir hjá Chelsea var ég ekki hissa. Á síðasta tímabili var hann kannski ekki með sjálfstraustið til að spila eins og hann vill spila.“

,,Fótboltinn snýst ekki bara um völlinn heldur líka einkalífið og allt sem því fylgir, kannski var eitthvað sem virkaði ekki fyrir hann hér.“