Kantmaðurinn Willian er í dag óvænt orðaður við endurkomu í ensku úrvalsdeildina.

Goal segir frá því að nýliða Fulham hafi áhuga á að ná í þennan 33 ára gamla Brasilíumann.

Aðeins er eitt ár síðan Willian yfirgaf England. Þá lék hann með Arsenal en fór til Corinthians í heimalandinu. Hann á 16 mánuði eftir af samningi sínum þar.

Willian hefur einnig leikið með Chelsea í ensku úrvalsdeildinni. Það gæti heillað hann og fjölskylduna að flytja aftur til Lundúna.

Þetta eru ekki einu fréttir dagsins af Corinthians.

Í morgun var Cristiano Ronaldo orðaður við félagið. Hann reynir að komast burt frá Manchester United.

„Ég á mér stóra drauma. Þetta er Corinthians. Eru ekki Willian og Renato Augusto hér? Það er allt mögulegt í fótbolta og það er skylda mín að gera mitt besta fyrir Corinthians,“ segir Duilio Monteiro Alves, forseti brasilíska félagsins.

„Ég veit ekki hvort það er möguleiki. Við höfum ekki prófað þetta eða kafað dýpra. Við höfum hins vegar auga með honum, ef hann skyldi vilja spila í Brasilíu.“