Mikil samkeppni hefur myndast hvað varðar sýningarrétt frá íþróttaviðburðum í íslensku sjónvarpi undanfarin ár.

Fyrir nokkrum árum sýndi Stöð 2 Sport frá ensku úrvalsdeildinni, Meistaradeild Evrópu, íslenskum íþróttum og fleiru.

Árið 2019 tók Síminn hins vegar yfir enska boltann og nú hefur Viaplay tryggt sér helminginn af sýningarréttinum á Meistaradeildinni, svo dæmi séu tekin.

Guðmundur Benediktsson hefur lengi starfað sem íþróttalýsandi og þáttastjórnandi á Stöð 2 Sport. Hann er gestur í nýjasta þætti Chess After Dark. Þar var hann spurður út í hvort hann hefði áhyggjur af aukinni samkeppni.

„Ég hef kannski ekki áhyggjur en menn þurfa að vera á tánum. Heimurinn er að breytast eins og allt, þú þarft bara að spila með. En áhyggjur? Nei. Ég mun seint bugast af áhyggjum,“ segir Guðmundur.

Stöð 2 Sport hefur hins vegar haldið í réttinn á stærstu íþróttunum hér heima.

„Það var tekin ákvörðun um það innahúss að það ætti að leggja mikla áherslu á íslenskar íþróttir, sérstaklega þessar þrjár boltaíþróttir. Það er lögð mikil áherslu á það og mikil dagskrá í kringum það allt.“

„Við tókum ítalska boltann inn í fyrra og hann verður áfram hjá okkur í vetur. Svo það er af nægu að taka.“