Henrikh Mkhityaryan var ekki sagt að yfirgefa Roma í sumar en hann tók þá ákvörðun sjálfur að semja við Inter Milan.

Mkhitaryan varð samningslaus hjá Roma og var það vilji stjóra liðsins, Jose Mourinho, að halda leikmanninum hjá félaginu.

Armeninn segir þó að Roma hafi ekki boðið sér gull og græna skó og ákvað þess í stað að skrifa undir í Mílanó.

Mourinho reyndi hvað hann gat til að halda miðjumanninum en án árangurs.

,,Mourinho vildi ekki sjá mig fara? Já það er rétt,“ sagði Mkhitaryan í samtali við DAZN.

,,Ekki bara hann heldur allt félagið. Að lokum þá gátum við ekki komist að samkomulagi svo ég tók ákvörðun um að fara.“

,,Þetta var gott fyrir mig og gott fyrir Roma því þeir fengu Paulo Dybala, ég er ánægður fyrir þeirra hönd.“