Ólafur Jóhannesson tók við af Heimi Guðjónssyni sem þjálfari Vals á dögunum. Heimir tók við Val eftir að félagið ákvað að framlengja ekki samning Ólafs haustið 2019.

Sparkspekingurinn Kristján Óli Sigurðsson segir frá því í Þungavigtinni í dag að Heimir hafi ekki svarað Ólafi er sá síðarnefndi reyndi að hringja í hann.

„Hann reyndi að hringja í Heimi Guðjónsson en hann svaraði ekki. Óli Jó ætlaði að ræða við hann en það var bara ekkert svar,“ segir Kristján í þættinum.

Heimir tók við af Ólafi sem þjálfari FH á sínum tíma. „Þetta er náttúrulega bara orðin hringavitleysa,“ segir Kristján. „En eins dauði er annars brauð.“

Valur hefur valdið vonbrigðum í Bestu deild karla í sumar og er í fimmta sæti með 21 stig eftir fjórtán umferðir.

Ólafur stýrði liði FH fyrr í sumar en var látinn fara eftir slæmt gengi.