Eiður Smári Guðjohnsen er gestur í nýjasta þætti Blökastsins, þar sem farið er yfir víðan völl.

Þessi goðsögn í íslenskum fótbolta sagði meðal annars góða sögu af vini sínum, Sverri Þór Sverrisyni, Sveppa.

Eiður vill meina að Sveppi hafi ekki alltaf verið alveg með það á hreinu hvað væri um að vera hjá sér, þrátt fyrir að hann væri að ná frábærum árangri á ferli sínum með félögum á borð við Barcelona og Chelsea.

Til að nefna dæmi segir Eiður sögu frá því þegar hann var að spila í 8-liða úrslitum Meistaradeildar Evrópu með Chelsea gegn Bayern Munchen.

„Þetta er sennilega besta dæmið um það,“ segir Eiður. „Það var leikur á miðvikudegi. Þetta voru fjórðungsúrslit í Meistaradeildinni. Eftir leik kíki ég á símann og sé SMS sem hafði komið frá Sveppa, sem hafði komið svona fimm mínútum fyrir hálfleik, hvað ég væri að bralla.“

„Hvað er ég að bralla? Ég er að spila hérna í Meistaradeildinni,“ segir Eiður og hlær.