Í morgun var sagt frá því í hlaðvarpsþættinum Dr. Football að ÍBV hafi heyrt hljóðið í umboðsmanni Cesc Fabregas, fyrrum leikmanni Arsenal, Chelsea og Barcelona. Daníel Geir Moritz, formaður knattspyrnudeildar karla hjá ÍBV, segir ekkert til í þessu.
Fabregas yfirgaf Monaco nýlega og er hann á leið til Como í ítölsku B-deildinni.
„Nú er ég Arsenal-maður svo það væri geðveikt, en það er ekki neitt til í því,“ segir Daníel Geir við 433.
„Það er leiðinlegt þegar aðrir fá hugmynd sem ég væri til í að hafa fengið sjálfur, en ég verð víst að lifa með því,“ bætti hann við, léttur í bragði.
ÍBV er í neðsta sæti Bestu deildar karla með fimm stig eftir tólf leiki. Liðið er fimm stigum frá öruggu sæti.
