Afturelding í Lengjudeild karla hefur á undanförnum tveimur heimaleikjum boðið upp á klippingu eða nudd í stúkunni á meðan leik stendur. Hefur þetta vakið mikla athygli.

Gísli Elvar Halldórsson, formaður meistaraflokksráðs karla hjá Aftureldingu, ræddi við Fréttablaðið um þetta uppátæki. „Pælingin er bara að fá stemningu á völlinn og fá sem flesta, hafa gaman á vellinum.“

Árangur á vellinum mun þó draga fólk enn frekar að, segir Gísli. „Ég held það dragi fleiri á völlinn ef liðið sækir stig, en þetta er gaman með og er öðruvísi.“

Afturelding stefnir á að halda þessu áfram. „Þetta verður kannski ekki á öllum leikjum en við ætlum að reyna að hafa eitthvað í gangi sem oftast,“ segir Gísli. Nánar er rætt við hann í Fréttablaðinu.

Afturelding er í áttunda sæti Lengjudeildarinnar með þrettán stig eftir tíu leiki. Liðið vann síðasta leik á heimavelli gegn Kórdrengjum.