Rúnar Alex Rúnarsson, markvörður Arsenal og íslenska landsliðsins, var gestur í nýjasta þætti Chess After Dark. Þar fór hann yfir víðan völl.
Í þættinum sagði Rúnar Alex meðal annars að hann dreymdi um að prófa að spila í Japan.
„Mig langar ógeðslega að prófa að spila í Japan og búa þar. Það er bara einhver draumur sem ég hef átt í einhver ár,“ sagði markvörðurinn.
„Ég á félaga sem spila í Japan og talar mjög vel um þetta. Mér finnst eitthvað við japanska menningu sem er rosa heillandi,“ bætti hann við.
Rúnar Alex lék á láni hjá Leuven í Belgíu á síðustu leiktíð. Nú snýr hann aftur til æfinga hjá Arsenal en framtíð hans er í óvissu.
„Það er ekki komið á hreint hvað gerist í sumar, hann er bara að fara til æfinga hjá Arsenal núna,“ sagði Magnús Agnar Magnússon, umboðsmaður Rúnars, í samtali við 433.is í vikunni.
Arsenal hefur gengið frá kaupum á Matt Turner en fyrir eru félagið með Aaron Ramsdale og Bernd Leno í sínum röðum. Búist er við að Leno fari í sumar og meiri líkur en minni eru á því að Rúnar fari frá Arsenal.
Rúnar er 27 ára gamall en hann hefur spilað fyrir Nordsjælland, Dijon, Arsenal og nú síðast Leuven á ferli sínum.
