Rúnar Alex Rúnarsson, markvörður Arsenal, var gestur í nýjasta þætti Chess After Dark. Þar fór hann yfir víðan völl.
Hann var spurður út í það hver væri skemmtilegastur í Arsenal. „Ég og Hector Bellerin náum mjög vel saman, ég hef mjög gaman að honum,“ sagði Rúnar.
„Ég held að við séum báðir þannig að við höfum áhuga á fullt af hlutum utan fótbolta. Lífið okkar er ekki endilega bara fótbolti frá A til Ö. Við áttum helling af sameiginlegum áhugamálum. Hann hjálpaði mér mikið þegar ég kom þangað fyrst.“
Rúnar talaði einnig vel um Pierre Emerick Aubameyang, sem nú leikur með Barcelona, er hann var spurður út í stjörnuna.„Hann er toppmaður. Við sátum hlið við hlið í klefanum og spjölluðum mikið á frönsku. Ég hafði mjög gaman að honum.“
Rúnar Alex lék á láni hjá Leuven í Belgíu á síðustu leiktíð. Nú snýr hann aftur til æfinga hjá Arsenal en framtíð hans er í óvissu.
„Það er ekki komið á hreint hvað gerist í sumar, hann er bara að fara til æfinga hjá Arsenal núna,“ sagði Magnús Agnar Magnússon, umboðsmaður Rúnars, í samtali við 433.is í gær.
Arsenal hefur gengið frá kaupum á Matt Turner en fyrir eru félagið með Aaron Ramsdale og Bernd Leno í sínum röðum. Búist er við að Leno fari í sumar og meiri líkur en minni eru á því að Rúnar fari frá Arsenal.
Rúnar er 27 ára gamall en hann hefur spilað fyrir Nordsjælland, Dijon, Arsenal og nú síðast Leuven á ferli sínum.
