Alfred Schreuder, nýr stjóri Ajax, hefur grínast með það að Erik ten Hag ætti ekki að vera að leita til félagsins í leit að nýjum leikmönnum.

Ten Hag var stjóri Ajax á síðustu leiktíð en hann ákvað að stökkva á tækifærið að taka við Manchester United fyrr í sumar.

Schreuder var áður stjóri Club Brugge í Belgíu og hann fær það verkefni að taka við keflinu af Ten Hag sem gerði virkilega góða hluti í Hollandi.

Leikmenn Ajax eru í dag orðaðir við enska stórliðið og þar sérstaklega sóknarmaðurinn Antony og varnarmaðurinn Jurrien Timber.

,,Erik veit að hann ætti ekki að vera kaupa leikmenn frá Ajax! Ég er að grínast, maður veit aldrei í fótboltanum,“ sagði Schreuder.

,,Það er ekki mikilvægt að tala við mig um Erik eða Man Utd. Við þurfum að tala um Ajax, við vitum að við erum stórt og sterkt félag.“