U-21 árs landslið Íslands mætir því tékkneska í umspili um sæti á Evrópumótinu árið 2023. Leikið verður heima og að heiman. Fara leikirnir fram á dögunum 19. – 27. september næstkomandi.
Lokamótið fer svo fram í Georgíu og Rúmeníu frá 21. júní til 8. júlí á næsta ári.
„Þetta er bara spennandi. Tékkarnir eru gott lið, voru með Englandi í riðli og fóru nokkuð örugglega í gegnum sína leiki. Þeir héldu sjö sinnum hreinu í tíu leikjum, sem er ansi gott,“ sagði Davíð Snorri Jónasson, þjálfari U-21 liðsins, við 433.is eftir dráttinn.
„Ég er ekkert búinn að skoða þá í þaula en aðeins búinn að kynna mér þá síðasta klukkutímann.“
Tékkland gerði góða hluti í riðli sínum með Englandi og endaði í öðru sæti, búast má við erfiðu verkefni fyrir U21 árs lið Íslands. Davíð er þó fullur sjálfstrausts.
„Við spiluðum við góð lið í okkar riðli líka. Ég tel okkar lið vera klárt í hvað sem er. Við þurfum að halda áfram með sama hugarfar.“
„Á þessu stigi eru öll liðin góð,“ sagði Davíð. „Þetta verða góðir leikir, tvö góð lið. “
