Víkingur vann 6-1 stórsigur á Levadia Tallin í undanúrslitum umspilsins um sæti í forkeppni Meistaradeildar Evrópu í kvöld.
Lestu nánar um leikinn hér.
„Þetta byrjaði brösulega en það var alvöru karakter að koma til baka og vinna þetta 6-1,“ sagði Kristall Máni Ingason eftir leik. Hann skoraði og lagði upp.
Kristall hafði engar sérstakar hugmyndir um Levadia fyrir leik. „Ég bjóst ekkert við neinu. Maður var bara búinn að sjá klippur af þeim. Maður þurfti bara að koma inn í þennan leik af krafti.“
Kristall segir að menn séu einbeittir á verkefnið gegn Inter d’Escaldes frá Andorra á föstudag. Sigurvegarinn fer í fyrstu umferð undankeppni Meistaradeildarinnar. „Þessi leikur var úrslitaleikur. Það er bara annar úrslitaleikur á föstudaginn.“
Það var fín mæting á völlinn þrátt fyrir vont veður. „Geðveikt veður og geðveikur stuðningur. Það er geðveikt að allir komi á völlinn og styðji okkur,“ sagði Kristall að lokum.
