Erling Braut Haaland var fyrr í morgun kynntur formlega til leiks sem nýr leikmaður Manchester City.

Vitað hefur verið af skiptunum lengi en eru þau formlega staðfest nú.

Þessi 21 árs gamli framherji kemur frá Dortmund. Man City gat keypt hann fyrir um 60 milljónir evra vegna klásúlu í samningi Norðmannsins.

Haaland hefur raðað inn mörkum fyrir Dortmund undanfarin tvö ár eða svo.

Norðmaðurinn fór í sitt fyrsta viðtal sem leikmaður Man City fyrr í dag og var hann meðal annars spurður út í af hverju City varð fyrir valinu.

„Að hluta til kem ég hingað vegna föður míns. Ég fæddist á Englandi og hef verið stuðningsmaður City allt mitt líf. Mér líður eins og heima hjá mér hér og tel mig geta þróað mig sem leikmann hér,“ sagði Haaland en faðir hans, Alf-Inge, lék með City á leikmannaferli sínum.

Haaland kveðst spenntur fyrir því að vinna með Pep Guardiola. „Ég talaði aðeins við hann. Við hlökkum til að vinna saman.“