Fernando Santos, landsliðsþjálfari Portúgal var spurður út í þá ákvörðun sína að láta Cristiano Ronaldo, leikmann Manchester United og markahæsta leikmann Portúgal byrja leikinn gegn Spánverjum í Þjóðadeild UEFA í gærkvöldi á bekknum. Þjálfarinn segir það hafa verið taktíska ákvörðun.
Leiknum lauk með 1-1 jafntefli en staðan var 1-0 fyrir spánverjum þegar að Ronaldo var kynntur til leiks á 60. mínútur. Portúgalir náðu síðan að jafna leikinn á 82. mínútu með marki frá Ricardo Horta.
,,Cristiano Ronaldo? Þeir spyrja oft hvers vegna hann er í byrjunarliðinu, þetta er milljón dollara spurningin. Ég taldi það betra fyrir þennan leik að byrja með þá leikmenn sem byrjuðu,“ sagði Santos við Reuters eftir leik Portúgal og Spánar.
Hann segir ákvörðunina taktíska. ,,Þetta var bæði tæknileg og taktísk ákvörðun fyrir leikinn. Fyrir mér var þetta besta lausnin miðað við það hvernig við vildum spila og nálgast þennan leik. Þetta snýst ekkert um gæði Ronaldo, bara alls ekki.“
