Þrír leikir fóru fram í Lengjudeild karla í dag.

Grótta tók á móti nýliðum KV sem var enn án stiga. Kjartan Kári Halldórsson kom heimamönnum yfir með marki af vítapunktinum á 24. mínútu. Tæpum stundarfjórðungi síðar skoraði hann sitt annað mark og kom Gróttu í 2-0. Rétt eftir þetta skoraði Óliver Dagur Thorlacius þriðja mark Gróttu áður en Grímur Ingi Jakobsson minnkaði muninn fyrir KV skömmu fyrir leikhlé. Patryk Hryniewicki í liði gestanna fékk rautt spjald eftir rúma klukkustund og fékk dæmt á sig víta í þokkabót. Staðan orðin svört fyrir Vesturbæinga. Kjartan Kári fór á punktinn og fullkomnaði þrennuna. Þegar stundarfjórðungur lifði leiks fékk KV víti en Oddur Ingi Bjarnason mistókst að minnka muninn af punktinum. Sigurður Hrannar Þorsteinsson innsiglaði svo 5-1 sigur Gróttu með marki á 85. mínútu.

Grótta er í öðru sæti deildarinnar með níu stig. KV er á botninum án stiga.

Það var einnig markaleikur fyrir vestan þar sem Vestri tók á móti Þór. Harley Willard kom Þórsurum yfir á 12. mínútu en sjö mínútum síðar jafnaði Nicolaj Madsen fyrir heimamenn. Vestri komst svo yfir skömmu síðar þegar Aron Birkir Stefánsson setti boltann í eigið net. Skömmu fyrir leikhlé jafnaði Nikola Kristinn Stojanovic metin fyrir gestina. Harley Willard skoraði sitt annað mark þegar stundarfjórðungur lifði leiks og kom Þór í 2-3. Chechu Meneses bjargaði hins vegar stigi fyrir Vestra með marki á 90. mínútu.

Þór er í áttunda sæti með fimm stig, jafnmörg og Vestri sem er sæti neðar á markatölu.

Grindavík og Fykir mættust þá á heimavelli fyrrnefnda liðsins. Úr varð fremur bragðdaufur leikur. Kristófer Páll Viðarsson, sem kom til Grindvíkinga frá Reyni Sandgerði á dögunum, gerði eina mark leiksins á 57. mínútu. Lokatölur 1-0.

Grindavík er í þriðja sæti deildarinnar með átta stig, stigi meira en Fylkir sem er sæti neðar.