Erik ten Hag leggur sig allan fram til að vera með allt á hreinu þegar undirbúningstímabil Manchester United hefst í lok júní.

Fjallað er um innkomu Ten Hag til félagsins en hann mætti til vinnu í vikunni og er byrjaður að láta til sín taka.

Ten Hag hefur talað við leikmenn félagsins og vill fá að vita allt um þá. Eitt af því sem hann vill vita er hvar leikmenn ætla að vera í sumarfríi sínu.

Hann vill vita eins mikið og hann getur um leikmennina áður en æfingar byrja. Mirror fjallar um málið.

Ten Hag hefur látið leikmenn vita af því að það sé ekkert annað í boði en að koma í frábæru formi til baka eftir sumarfrí. Ten Hag vill að leikmenn United séu klárir í að taka við hugmyndum hans.

Ten Hag kemur til United frá Ajax en hann ákvað að byrja æfingar í lok júní frekar en í júlí og fá leikmenn því styttra sumarfrí.