Þjálfaramál Valsmanna voru til umræðu í hlaðvarpsþættinum Dr. Football í dag en farið er að hitna undir Heimi Guðjónssyni, þjálfara karlaliðs félagsins strax í upphafi tímabils. Valsmenn eru sem stendur í 4. sæti Bestu deildarinnar með 13 stig eftir sjö umferðir, átta stigum á eftir toppliði Breiðabliks.

Mikið var lagt í styrkingu á leikmannahópi Valsmanna milli tímabila og inn komu meðal annars Aron Jóhannsson og Hólmar Örn Eyjólfsson.

Valsmenn mæta Breiðablik á útivelli í 32-liða úrslitum Mjólkurbikarsins á fimmtudaginn kemur.

,,Haldiði að Valsmenn skipti um þjálfara ef illa fer? Báðar dollurnar farnar og við erum enn í maí,“ spurði Hjörvar Hafliðason, umsjónarmaður Dr. Football.

Ingimar H. Finnsson, einn af sérfræðingum þáttarins segir það pottþétt vera til umræðu hjá forráðamönnum Vals. ,,Ef þeir detta út í bikarnum og staðan í deildinni eins og hún er…Ég held hins vegar að hann fái aðeins lengri tíma en það.“

Jóhann Már Helgason, annar sérfræðingur þáttarins tók undir það. ,,Ég held að þetta gerist ekki strax en svo mun þetta líka velta á því hvað annað er í boði.