Roberto Mancini, núverandi stjóri ítalska karlalandsliðsins í knattspyrnu, vill snúa aftur í ensku úrvalsdeildina á næstu leiktíð og telur Fabrizio Romano að honum gæti verið boðið starfið hjá Manchester United.

Manchester United er í leit að langtímastjóra en Ralf Rangnick tók við liðinu til bráðabirgða eftir að Ole Gunnar Solskjaer var rekinn frá félaginu.

„Honum finnst freistandi að snúa aftur í ensku úrvalsdeildina. Hann vill koma aftur einhvern daginn,“ sagði Fabrizio Romano í YouTube þættinum FIVE sem Rio Ferdinand stjórnar.

„Mancini er eins og er upptekinn með Ítalíu og það á eftir að koma í ljós hvort liðið komist á Heimsmeistarakeppnina. En eftir það þá gæti United talað við hann, það er möguleiki.“

Rio Ferdiand sagði í þættinum að það væri enginn möguleiki á því að Mancini myndi taka við Manchester United en Romano er ekki sammála því.