Enska úrvalsdeildin íhugar að breyta reglum varðandi frestun leikja vegna fækkandi Covid smita undanfarnar fjórar vikur.

Nefndarmenn munu hittast á miðvikudag til ræða málin. Deildin hefur frestað 22 leikjum á yfirstandandi tímabili vegna Covid smita, meiðsla og landsliðsverkefna og hefur enska úrvalsdeildin hlotið gagnrýni fyrir.

Viðureign Arsenal og Tottenham þann 16. janúar síðastliðinn var síðasti leikurinn sem frestað var vegna kórónuveirunnar. Nýjar reglur gætu tekið gildi fyrir 5. febrúar næstkomandi þegar deildin hefst á ný eftir tveggja vikna hlé.

Enska úrvalsdeildin var gagnrýnd eftir að fréttir bárust um að félög væru að notfæra sér reglur um frestun leikja. Félögum var tilkynnt í desember að ekki væri hægt að fara fram á frestun ef lið hefði fleiri en 13 útileikmenn leikfæra auk markmanns.

Félög geta lagt fram beiðni um frestun, ekki einungis vegna Covid smita, heldur ef leikmenn liðsins eru meiddir eða með landsliðum sínum.

Forsvarsmenn telja að nú sé tímabært að breyta reglunum þar sem slakað hefur verið á sóttvarnarreglum á Englandi, og tilfellum hefur fækkað í ensku úrvalsdeildinni á undanförnum fjórum vikum.