Tími Eden Hazard hjá spænska stórveldinu Real Madrid hefur ekki verið upp á marga fiska en hann var keyptur frá Chelsea árið 2019 fyrir tæpar 90 milljónir punda. Hann hefur aðeins spilað 60 leiki fyrir félagið en hann hefur verið mikið meiddur.
Hazard á enn tvö ár eftir af samning við Real Madrid en hann hefur sterklega verið orðaður við brottför frá félaginu.
Lið í ensku úrvalsdeildinni hafa áhuga og hefur Newcastle boðið í leikmanninn en Hazard neitaði þeim félagsskiptum.
Johan Boskamp, fyrrum leikmaður Feyenoord og RWD Molenbeek, telur að Hazard vilji fara til Aston Villa til að fá meiri spilatíma fyrir HM í Katar sem fer fram í lok árs. Steven Gerrard tók við Aston Villa í nóvember á síðasta ári og hefur nú þegar lokkað Philippe Coutinho til félagsins frá Barcelona.