Ray Parlour, fyrrverandi leikmaður Arsenal, telur Mikel Arteta, knattspyrnustjóra Arsenal, eiga mikinn vanda á höndum með agaleysi leikmanna sinna sem séu alltof oft að fá á sig rauð spjöld.

Þessa skoðun lét Parlour í ljós í útvarpsþætti TalkSport í morgun en Arsenal tapaði í gær fyrir Liverpool í enska deildarbikarnum þar sem miðjumaðurinn Thomas Partey, var rekinn af velli með rautt spjald aðeins nokkrum mínútum eftir að hann kom inn á sem varamaður.

,,Hann þarf að setjast niður með leikmönnum sínum og segja ‘þið eruð að gera alltof mikið af aulalegum mistökum’. Partey verður ekki með um helgina og þeir voru nú þegar þunnskipaðir á miðjunni,“ sagði Ray Parlour á Talksport.

Parlour var hluti af frekar grófu Arsenal liði á sínum tíma.

,,Við fengum alveg rauð spjöld, ég er ekki að segja að við gerðum það ekki en bara ekki jafn oft og leikmenn Arsenal núna virðast vera að fá rauð spjöld. En þetta voru virkilega aulaleg mistök í gærkvöldi og enn á ný hefur Thomas Partey brugðist liði sínu,“ sagði Ray Parlour, fyrrverandi leikmaður Arsenal.