Dani Alves, leikmaður Barcelona og fyrrum liðsfélagi Lionel Messi hjá félaginu, grátbiður hann um að snúa aftur til Katalóníu og til Barcelona.

,,Messi er besti knattspyrnusmaður sögunnar og það er skrýtið að vera hérna í Barcelona og sjá hann ekki hér, að hafa hann ekki í leikmannahópi Barcelona,“ sagði Dani Alves sem sneri aftur til Barcelona á síðasta ári, í viðtali í útvarpsþættinum Tot Costa de Catalunya Radio.

Alves segist hafa rætt við Messi um mögulega endurkomu.

,,Ég hef sagt honum að það er ekki til betri staður fyrir hann en Barcelona. Hann sagði það nákvæmlega sama við mig þegar að ég fór frá Barca á sínum tíma. Það myndi vera frábært ef hann gæti endað feril sinn hér.“

Messi gekk til liðs við Paris Saint-Germain á frjálsri sölu fyrir yfirstandandi tímabil og skrifaði undir samning út tímabilið 2023. Honum hefur gengið erfiðlega að fóta sig í Frakklandi, hefur spilað 16 leiki fyrir félagið, skorað 6 mörk og gefið 5 stoðsendingar.

Stuðningsmenn Barcelona myndu taka fagnandi á móti Messi ef hann myndi snúa á ný til félagsins. Messi hefur unnið allt sem hægt er að vinna með Barcelona, spilað 778 leiki fyrir félagið, skorað 672 mörk og gefið 301 stoðsendingu.