Samkvæmt heimildum 433.is er Valur að næla í markvörðinn Guy Smit frá Leikni Reykjavík. Hinn 26 ára gamli Smit hefur verið hjá Leikni síðustu tvö tímabil. Hann varði mark liðsins með miklum sóma í Pepsi Max-deildinni í sumar.
Fyrir hjá Val er markvörðurinn Hannes Þór Halldórsson. Hann er samningsbundinn út næstu leiktíð. Möguleiki er á því að riftunarákvæði sé í samningi Vals og Hannesar, það er þó ekki staðfest.
Hannes er besti markvörður í sögu Íslands en framtíð hans hjá Val virðist vera í óvissu. „Ég get ekki gefið neitt upp með það, það er nú bara þannig,“ sagði Hannes við Fótbolta.net í dag.
Hannes segir að enginn svari símtölum á Hlíðarenda eftir að tímabilinu lauk. „Nei, það eru engar og næst ekki í neinn niðri á Hlíðarenda.“
Hannes hætti með landsliðinu á dögunum en hann er orðaður við KR þessa dagana.