Hans-Joachim Watzke, forstjóri Borussia Dortmund, segist gera sér grein fyrir því að erfitt verði að halda norska framherjanum Erling Braut Haaland hjá félaginu næsta sumar.
Hinn 21 árs gamli Haaland hefur verið frábær fyrir Dortmund frá því hann kom til félagsins frá RB Salzburg í janúar 2020. Hann hefur verið orðaður við stærstu félög heims í þó nokkurn tíma.
Haaland er með klásúlu um að geta farið frá Dortmund næsta sumar. Því hefur verið fleygt fram að upphæð á bilinu 67-77 milljónir punda myndi duga til að klófesta Haaland vegna klásúlunnar.
,,Auðvitað verður það erfitt (að halda Haaland). Ég útiloka það þó ekki algjörlega,“ sagði Watzke við þýska blaðið Welt am Sonntag.
Haaland hefur undanfarið verið orðaður við Chelsea og Liverpool á Englandi, ásamt fleiri stórliðum í Evrópu.
