Albert Guðmundsson og félagar í AZ Alkmaar sóttu FC Twente heim í hollensku úrvalsdeildinni í kvöld.
Ricky van Wolfsvinkel kom heimamönnum yfir strax á 1. mínútu og Dan Roots bætti við öðru marki fyrir Twente á 17. mínútu.
Jesper Karlsson minnkaði muninn fyrir AZ Alkmaar undir lok fyrri hálfleiks eftir stoðsendingu frá Fredrik Midtsjo en lengra komust AZ menn ekki og Dimitris Limnios gerði út um leikinn þegar hann skoraði þriðja mark heimamanna í uppbótartíma.
Lokatölur 3-1 og fjórða tap AZ Alkmaar í fimm leikjum á tímabilinu staðreynd.
Albert Guðmundsson lék allan leikinn og nældi sér í gult spjald þegar að sex mínútur voru eftir af venjulegum leiktíma. FC Twente er í 6. sæti deildarinnar með 10 stig eftir 6 leiki. AZ Alkmaar er í 17. sæti með 3 stig eftir 5 leiki.
