Kristján Óli Sigurðsson, sérfræðingur í hlaðvarpsþættinum Dr. Football, spáir því að Fylkir muni falla úr Pepsi Max-deild karla í haust.
Fylkir hefur ekki unnið í síðustu sex leikjum í deildinni. Liðið tapaði 2-0 gegn Stjörnunni í miklum fallbaráttuslag í gær.
Árbæingar eru í tíunda sæti, 2 stigum fyrir ofan fallsæti þegar fjórar umferðir eru eftir.
,,Ég er búinn að spá Fylki falli og ég stend ennþá við þá spá. Það er ekkert í gangi uppi í Árbæ,“ sagði Kristján í nýjasta þætti Dr. Football.
Ólafur Stígsson og Atli Sveinn Þórarinsson stýra Fylki saman. Kristján virðist vera farinn að efast um blönduna.
,,Draugurinn sem er kenndur við fall er farinn að banka hressilega á dyrnar. Það er spurning hvort að þetta tveggja þjálfara kerfi sé ekki bara að fjúka út um gluggann.“
Fylkir á erfiða dagskrá fyrir höndum í lokaumferðum Pepsi Max-deildarinnar. Breiðablik, KA, ÍA og Valur verða andstæðingarnir þar.
