Hinn 19 ára gamli Sölvi Snær Guðbjargarson hefur ekki farið með himinskautum frá því hann kom til Breiðabliks frá Stjörnunni í vor. Hann var til umræðu í hlaðvarpsþættinum Innkastið á Fótbolta.net á dögunum.
Það var mikið fjaðrafok í kringum Sölva í vor í kringum skiptin frá Garðabæ yfir í Kópavog. Talið er að stjórn Stjörnunnar hafi ekki viljað sjá leikmannin spila fyrir félagið fyrr en hann skrifaði undir nýjan samning. Samningur hans við Stjörnuna átti þá að renna út eftir þetta tímabil og var hann enn leikmaður félagsins. Rúnar Páll Sigmundsson, þáverandi þjálfari liðsins, setti hann þó inn á sem varamann í einum leik. Vangaveltur voru um það hvort að það hafi ýtt undir ósætti Rúnars við stjórnina og á endanum orðið til þess að þjálfarinn sagði upp nokkrum dögum síðar.
Sölvi gekk í raðir Breiðabliks eftir að tímabilið hófst. Hann hefur aðeins komið við sögu í fimm leikjum í Pepsi Max-deildinni fyrir Blika.
,,Maður hefur heyrt það bara af æfingum nánast hjá Breiðabliki að hann eigi langt í land og sé bara ekkert á pari við leikmenn Breiðabliks. Hann er bara eftir á í hraða, eftir á í þoli, þetta er bara eitthvað sem maður heyrir,“ sagði Tómas Þór Þórðarson í Innkastinu.
Ingólfur Sigurðsson, sem einnig var í þættinum, sagði að hægt væri að setja spurningamerki við uppeldisfélag Sölva.
,,Ef það er rétt þá finnst mér það ekki síst vera áfellisdómur fyrir Stjörnuna. Hvað er búið að vera að gera á æfingum þar?“
Tómas hefur ekki heillast af Sölva í búningi Breiðabliks hingað til. Hann finnur þó til með honum eftir umræðuna í kringum leikmanninn unga í byrjun leiktíðar og vonast til þess að hann muni bæta sig.
,,Þegar hann hefur verið að koma inn á hefur hann ekki litið út eins og leikmaður sem getur spilað í þessu Blika-liði. Maður er að heyra að honum gangi illa að komast í takt við þetta. En hann hefur klárlega hæfileikanna, vonandi gengur þetta upp hjá honum. Þetta er náttúrulega búin að vera ein sorgarsaga fyrir drenginn, nóg vorkenndi maður honum hvað hann var settur undir slátturvélina í byrjun tímabils.“
