Síðustu ár hafa verið erfið fyrir stuðningsmenn Þróttar þegar kemur að karlaliði félagsins. Á meðan stelpurnar blómstra í efstu deild er karlaliðið enn eitt árið í fallbaráttu.

Þróttur tapaði á heimavelli gegn Aftureldingu um helgina en farið var yfir leikinn í markaþætti Lengjudeildarinnar á Hringbraut í gær.

Guðlaugur Baldursson tók við þjálfun liðsins fyrir tímabilið en falldraugurinn sem verið hefur yfir Laugardalnum síðustu ár er byrjaður að minn á sig á nýjan leik. Engu hefur breytt hver stýrir Þrótti síðustu ár, liðið hefur sogast niður í fallbaráttu í Lengjudeildinni.

„Það virðist engu breyta hjá Þrótti hvaða þjálfari tekur við liðinu, liðið er bara í kjallarabaráttu. Núna eru fjögur stig upp í öruggt sæti, ég er nú ekki að segja að það sé komið að því en þeir hafa dansað við falldrauginn síðustu ár. Telur þú að þeir fari niður í sumar?,“ sagði Hörður Snævar Jónsson stjórnandi þáttarins í gær.

Hrafnkell Freyr Ágústsson, sérfræðingur í þættinum telur að Þróttur þurfi að opna veskið nú þegar félagaskiptaglugginn opnar.

„Það fer eftir því hvað þeir gera í glugganum, þeir verða að sækja sér miðvörð og líka miðjumann ef Sam Hewson er meiddur mikið lengur. Það vantar mann sem getur fengið boltann á miðsvæðinu, Þróttarar hafa verið allt í lagi í sumar,“ sagði Hrafnkell.

Umræðu um þetta má sjá hér að neðan.