Mohamed Salah leikmaður Liverpool ætlar að grátbiðja forráðamenn félagsins um að hleypa sér á Ólympíuleikana í sumar. Salah vill ólmur taka þátt í mótinu með Egyptum.
Salah vonast til að taka þátt í mótinu sem fer fram frá 21 júlí til 7 ágúst. Enska úrvalsdeildin hefst 14 ágúst.
Liverpool hefur ekki viljað hleypa Salah í mótið en hann ætlar sér að ræða við forráðamenn félagsins á næstu dögum. Frá þessu greinir forseti knattspyrnusambands Egyptalands.
„Salah hefur samþykkt að leiða liðið á leikunum, það er því ekki ómögulegt að hann komi en þetta er erfitt,“ sagði Ahmed Megahed, forseti sambandsins.
„Liverpool hefur hafnað beiðni okkar en Salah ætlar að reyna sitt besta, þeir vilja ekki missa hann því félagið veit af Afríkukeppninni í janúar.“
