Forráðamenn FH liggja nú yfir málefnum félagsins og funda um hvað skal gera, þetta herma heimildir 433.is.
Samkvæmt heimildum skoða forráðamenn FH að reka Loga Ólafsson úr starfi en tíðinda má vænta í dag ef af verður. FH tapaði 4-0 gegn Breiðabliki í gær í efstu deild karla.
FH hefur aðeins náð í eitt stig í síðustu fimm leikjum og eru líkur á því að Logi verði látinn fara. Logi tók við liðinu í vetur þegar Eiður Smári Guðjohnsen hætti störfum til að taka við landsliðinu, saman höfðu þeir stýrt liðinu á síðustu leiktíð en Logi ætlaði að stíga til hliðar.
Samkvæmt heimildum 433.is eru ansi miklar líkur á því að Ólafur Jóhannesson taki við þjálfun FH en hann vann kraftaverk í Kaplakrika á árum áður.
Ólafur lét af störfum sem þjálfari Stjörnunnar síðasta haust en hann hafði starfað hjá félaginu í eitt tímabil. Áður var hann þjálfari Vals þar sem hann fjóra titla á fjórum árum áður en félagið lét hann fara haustið 2019.
Ólafur var fyrst þjálfari FH árið 1988 til ársins 1990, hann tók aftur við þjálfun liðsins árið 1995. Hann kom svo aftur árið 2003 og gerði liðið að Íslandsmeisturum árið 2004, 2005 og 2006, hann lét af störfum árið 2007 og tók við íslenska landsliðinu.
Ef Ólafur tekur við starfinu verður þetta því í fjórða sinn sem Ólafur tekur við FH.