Það var líf og fjör í markaþætti Lengjudeildarinnar sem sýndur var á Hringbraut á mánudag. Í þættinum sem er vikulega voru allir leikir 4 umferðar skoðaðir.
Selfoss og Grótta gerðu 3-3 jafntefli en eftir leikinn skellti Gary Martin framherji Selfoss sér á Twitter og sendi pillu á þáttinn. Hörður Snævar Jónsson og Hrafnkell Freyr Ágústsson höfðu talað um það að Gary og Hrovje Tokic framherji liðsins væru ekkert sérstaklega góðir í mótlæti.
Selfoss var 0-3 undir en tókst að jafna leikinn og enski framherjinn var fljótur að svara fyrir sig á Twitter eftir leik.
Not good to have me and toka when ya 3-0 down 🐸 pic.twitter.com/yLD1k2sOSw
— Gary martin (@feedthebov) May 28, 2021
„Við vorum með smá pillu á Tokic og Gary í síðasta þætti, þeir svöruðu því heldur betur. Þeir gerðu það sem við töluðum um, voru ekkert sérstakir í mótvind en góðir í meðvind. Þeir voru með vindinn í síðari hálfleik,“ sagði Hrafnkell Freyr léttur.
Hörður taldi það ekki vera tilefni til þess að vera með læti á Twitter eftir jafntefli gegn Gróttu á heimavelli. „Ef að árangur Selfoss er góður þegar þeir gera jafntefli við Gróttu á heimavelli, þá eru þeir í vondum málum.“
Hrafnkell bætti þá við. „Menn eru mikið að mæta á Twitter eftir jafntefli núna.“
Umræðuna má sjá hér að neðan.